ទំព័រដើម

យន្តការគាំទ្រផ្នែកហិរញ្ញវត្ថុ

ការគាំទ្រពីរដ្ឋ

ការផ្តល់ការគាំទ្រពីរដ្ឋសម្រាប់គម្រោងភ.រ.ជ. អាចមានទម្រង់ដូចខាងក្រោម៖

ការបំពេញផលហិរញ្ញវត្ថុ៖ជាការឧបត្ថម្ភធនពីរដ្ឋជូនចំពោះដៃគូឯកជន ដើម្បីបន្ថយចំណាយមូលធនរបស់ដៃគូឯកជននិងបង្កើនផលចំណេញផ្នែកហិរញ្ញវត្ថុរបស់គម្រោង។ ការទូទាត់ ប្រាក់ឧបត្ថម្ភធនបែបនេះ ត្រូវអនុវត្តតាមការសម្រេចបង្គោលចរសមិទ្ធផលការងារ នៅក្រោយពេលការងារសាងសង់បានចាប់ផ្ដើមនិងអាចបន្តយូរបំផុតត្រឹម ០២(ពីរ)ឆ្នាំ ក្រោយពេលការងារសាងសង់បានបញ្ចប់ជាស្ថាពរ។ គោលការណ៍លម្អិតនៃការបំពេញផលហិរញ្ញវត្ថុត្រូវអនុវត្តតាមនីតិវិធីនៃការគ្រប់គ្រងមូលនិធិបំពេញផលហិរញ្ញវត្ថុ។
ការទូទាត់ថ្លៃសេវាផ្អែកលើថវិការដ្ឋ៖ជាការទូទាត់ទាំងស្រុងឬមួយចំណែកនៃថ្លៃសេវារបស់ដៃគូឯកជនសម្រាប់ការងារធ្វើប្រតិបត្តិការលើទ្រព្យសម្បត្តិគម្រោងភ.រ.ជ.និង/ឬការផ្តល់ សេវាកម្មដល់អ្នកប្រើប្រាស់សាធារណៈ។ ការទូទាត់ថ្លៃសេវាផ្អែកលើថវិការដ្ឋអាចអនុវត្តបានក្នុងករណី រាជរដ្ឋាភិបាលឯកភាពថាកម្រៃសេវាដែលដៃគូឯកជនត្រូវប្រមូលពីអ្នកប្រើប្រាស់សាធារណៈ មិនគ្រប់គ្រាន់ ឬមិនអាចប្រមូលបាន ឬមិនគួរប្រមូលពីអ្នកប្រើប្រាស់សាធារណៈ។ ការទូទាត់បែបនេះ ត្រូវអនុវត្តនៅក្រោយពេលការងារសាងសង់ត្រូវបានបញ្ចប់ជាស្ថាពរក្នុងករណីមានការសាងសង់ និង នៅពេលប្រតិបត្តិការការងារគម្រោងត្រូវបានចាប់ផ្ដើម។
កាតព្វកិច្ចបំណុលជាយថាហេតុរបស់រដ្ឋ៖ជាកិច្ចធានាមួយចំនួនដែលផ្ដល់ជូនដៃគូឯកជន ឬភាគីពាក់ព័ន្ធក្នុងករណីពិសេសដើម្បីដោះស្រាយផលប៉ះពាល់ដែលអាចនឹងកើតឡើងដោយសារ ព្រឹត្តិការណ៍ជាយថាហេតុនិង/ឬហានិភ័យដែលមានចែងក្នុងកិច្ចសន្យាភ.រ.ជ.។ ការសម្រេចផ្ដល់កិច្ចធានាត្រូវអនុលោមតាមច្បាប់និងលិខិតបទដ្ឋានគតិយុត្តជាធរមាននៃព្រះរាជាណាចក្រកម្ពុជា។ អាស្រ័យលើលក្ខណៈនៃគម្រោងភ.រ.ជ.នីមួយៗ រាជរដ្ឋាភិបាលអាចផ្ដល់កិច្ចធានាដែលមានទម្រង់ ដូចខាងក្រោម៖
1. កិច្ចធានាសមិទ្ធកម្មតាមកិច្ចសន្យា៖ជាកិច្ចធានាដែលផ្ដល់សំណងក្នុងករណីស្ថាប័នសាមីឬស្ថាប័នសាធារណៈណាមួយមិនបានបំពេញកាតព្វកិច្ចរបស់ខ្លួន ដូចមានចែងក្នុងកិច្ចសន្យាភ.រ.ជ. ឬកិច្ចព្រមព្រៀងពាក់ព័ន្ធនឹងការអនុវត្តគម្រោងភ.រ.ជ.។
2. កិច្ចធានាចំពោះហានិភ័យអធិបតេយ្យឬនយោបាយ៖ជាកិច្ចធានាដែលផ្ដល់សំណងក្នុងករណីសកម្មភាពនយោបាយឬគោលនយោបាយរបស់រាជរដ្ឋាភិបាល ធ្វើឱ្យមានផលប៉ះពាល់អវិជ្ជមានចំពោះដៃគូឯកជន មានជាអាទិ៍ករណីអស្សាមិករណ៍ ករណីជាតូបនីយកម្ម និងករណីអំពើហិង្សាដែលកើតឡើងដោយសារសកម្មភាពនយោបាយ។
3. កិច្ចធានាផ្សេងទៀត៖ជាកិច្ចធានាទម្រង់ផ្សេងទៀតដែលអនុម័តដោយរាជរដ្ឋាភិបាល អនុលោមតាមច្បាប់និងលិខិតបទដ្ឋានគតិយុត្តជាធរមាន
វិភាគទានជាទ្រព្យសម្បត្តិ៖ជាការផ្ដល់វិភាគទានដែលជាទ្រព្យសម្បត្តិរដ្ឋចំពោះគម្រោងភ.រ.ជ.។
ការលើកទឹកចិត្តវិនិយោគ៖ជាការផ្តល់ការលើកទឹកចិត្តវិនិយោគនិង/ឬការរៀបចំគោលនយោបាយអនុគ្រោះចំពោះការវិនិយោគ ដោយអនុលោមតាមជំពូកទី៨នៃច្បាប់នេះ។

មូលនិធិអភិវឌ្ឍន៍គម្រោង

មូលនិធិអភិវឌ្ឍន៍គម្រោង៖ ផ្តល់ហិរញ្ញប្បទានដល់ក្រសួងស្ថាប័នសាមី (IAs) ដើម្បីរ៉ាប់រងការចំណាយលើសេវាកម្មទីប្រឹក្សា ដែលជួយរៀបចំអភិវឌ្ឍន៍គម្រោង និង/ឬ ការវាយតម្លៃ ការជ្រើសរើសដៃគូឯកជន និងកិច្ចការពាក់ព័ន្ធផ្សេងទៀត