នាយកដ្ឋានអភិវឌ្ឍន៍គម្រោង មានតួនាទី និងភារកិច្ច ដូចតទៅ៖

• គាំទ្រផ្នែកប្រតិបត្តិការដល់ក្រសួង-ស្ថាប័នរបស់រាជរដ្ឋាភិបាលដែលទទួលបានសិទ្ធិប្រទានក្នុងការចុះកិច្ចសន្យាជាមួយដៃគូឯកជន ដើម្បីជ្រើសរើស រៀបចំរចនាសម្ព័ន្ធគម្រោង និងធ្វើកិច្ចលទ្ធកម្ម រហូតដល់ការចុះកិច្ចសន្យាគម្រោងជាស្ថាពរ។
• ធ្វើការវាយតម្លៃលើសំណើគម្រោង តាមយន្តការភាពជាដៃគូរវាងរដ្ឋ និងឯកជន ដោយផ្អែកតាមគោលការណ៍ណែនាំស្តីពីការធ្វើអត្តសញ្ញាណកម្ម និងជ្រើសរើសគម្រោង ឬគោលការណ៍ណែនាំផ្សេងៗទៀត ព្រមទាំងរៀបចំបញ្ជី សំណើគម្រោងបឋម ដែលជាមូល ដ្ឋានសម្រាប់ការធ្វើអាទិភាពវូបនីយកម្មបន្ត។
• គ្រប់គ្រងប្រតិបត្តិការប្រចាំថ្ងៃនៃការប្រើប្រាស់មូលនិធិអភិវឌ្ឍន៍គម្រោង (Project Development Facility) ឬមូលនិធិស្រដៀងគ្នានេះ ឬការប្រើប្រាស់កម្រៃជោគជ័យនៃការសម្រេចគម្រោង ដើម្បីទូទាត់ជូនក្រុមទីប្រឹក្សាប្រតិបត្តិការ (Transaction Advisors) ដែលផ្តល់ការគាំទ្រលើការសិក្សា រៀបចំ និងអភិវឌ្ឍន៍គម្រោង តាមយន្តការភាពជាដៃគូរវាងរដ្ឋ និងឯកជន។
• ផ្តល់នូវការគាំទ្រចាំបាច់នានាដល់ក្រសួង-ស្ថាប័នរបស់រាជរដ្ឋាភិបាល ដែលទទួលបានសិទ្ធិប្រទាន ក្នុងការចុះកិច្ចសន្យាជាមួយដៃគូឯកជន ដើម្បីពិនិត្យលទ្ធភាពនៃការគាំទ្រហិរញ្ញវត្ថុពីប្រភពថវិកាជាតិ ឬប្រភពថវិកាផ្សេងៗ សម្រាប់សំណើគម្រោងតាមយន្តការភាពជាដៃគូរវាងរដ្ឋ និងឯកជន ដែលអនុលោមតាមគោលការណ៍តម្លៃនៃលុយ (Value for Money)។
• ត្រួតពិនិត្យ និងផ្តល់អនុសាសន៍រួម លើរាល់ការវិភាគលើហានិភ័យពាក់ព័ន្ធ រួមទាំងផលប៉ះពាល់ កាតព្វកិច្ច និងការលើកទឹកចិត្តផ្នែកសារពើពន្ធសម្រាប់រៀបចំនិងអភិវឌ្ឍន៍គម្រោង តាមយន្តការភាពជាដៃគូរវាងរដ្ឋ និងឯកជន ដែលបានពិនិត្យនិងផ្តល់យោបល់ដោយក្រសួង-ស្ថាប័នពាក់ព័ន្ធរបស់រាជរដ្ឋាភិបាល ដើម្បីដាក់ជូនរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុពិនិត្យនិងសម្រេច តាមរយៈគណៈកម្មការអន្តរក្រសួង ដឹកនាំការអនុវត្តគោលនយោបាយស្តីពីការអភិវឌ្ឍយន្តការភាពជាដៃគូរវាងរដ្ឋនិងឯកជន។
• សម្របសម្រួលជាមួយក្រសួង-ស្ថាប័នពាក់ព័ន្ធរបស់រាជរដ្ឋាភិបាល ក្នុងការពិនិត្យ និងវាយតម្លៃរាល់ទិដ្ឋភាពបច្ចេកទេសទិដ្ឋភាពសេដ្ឋកិច្ចនិងហិរញ្ញវត្ថុ ទិដ្ឋភាពច្បាប់ និងលិខិតបទដ្ឋានគតិយុត្ត ព្រមទាំងទិដ្ឋភាពសង្គម និងបរិស្ថាន ពាក់ព័ន្ធនឹងសំណើគម្រោង តាមយន្តការភាពជាដៃគូរវាងរដ្ឋ និងឯកជន។
• ផ្ដល់ការគាំទ្រក្នុងការពិនិត្យ និងអនុម័តសំណើគម្រោង តាមយន្តការភាពជាដៃគួរវាងរដ្ឋ និងឯកជន ដោយគណៈកម្មការអន្តរក្រសួងដឹកនាំការអនុវត្តគោលនយោបាយស្តីពី ការអភិវឌ្ឍយន្តការភាពជាដៃគួរវាងរដ្ឋ និងឯកជន។
• បុរេជ្រើសរើសក្រុមហ៊ុនទីប្រឹក្សា ដែលមានលក្ខណៈសម្បត្តិ និងគុណវុឌ្ឍិគ្រប់គ្រាន់ ក្រោមកិច្ចសន្យាផ្តល់សេវាកម្មគ្មានកាលកំណត់ (Indefinite Delivery Contract) និងផ្តល់ការគាំទ្រដល់ក្រសួង-ស្ថាប័នរបស់រាជរដ្ឋាភិបាល ក្នុងការជ្រើសរើសក្រុមទីប្រឹក្សាប្រតិបត្តិការ ពីចំណោមក្រុមហ៊ុនទីប្រឹក្សាដែលបានជ្រើសរើស។
• ផ្តល់ការគាំទ្រដល់ក្រសួង-ស្ថាប័នរបស់រាជរដ្ឋាភិបាល ដែលទទួលបានសិទ្ធិប្រទាន ក្នុងការចុះកិច្ចសន្យាជាមួយដៃគូឯកជន ដើម្បី បោះផ្សាយសេចក្តីជូនដំណឹងស្តីពីការប្រគល់កិច្ចសន្យា (Notice of Award) សម្រាប់ការអនុវត្តគម្រោង។
• អភិវឌ្ឍន៍គម្រោងសាកល្បង តាមយន្តការភាពជាដៃគូរវាងរដ្ឋ និងឯកជន ដើម្បីដកស្រង់បទពិសោធន៍ពាក់ព័ន្ធនានានឹងការអនុវត្តប្រភេទកិច្ចសន្យាតាមយន្តការភាពជាដៃគូរវាងរដ្ឋ និងឯកជន ព្រមទាំងកសាងសមត្ថភាពស្ថាប័នតាមរយៈការអនុវត្តអភិក្រម “រៀនផង- ធ្វើផង” ។
• គ្រប់គ្រងកិច្ចសន្យា និងទីប្រឹក្សា/ ក្រុមហ៊ុនទីប្រឹក្សា ដែលមានតួនាទីនិងភារកិច្ចពាក់ព័ន្ធនឹងផ្នែកនេះ។
• បំពេញភារកិច្ចផ្សេងទៀត តាមការកំណត់របស់ប្រធានអង្គភាព។