ការរៀបចំអភិវឌ្ឍកំពង់ផែទេសចរណ៍ស្រុកឆ្លូង គឺមានគោលដៅក្នុងការជំរុញវិស័យទេសចរណ៍ និងស្រូបទាញនូវកំណើនប្រជាជននៅភូមិភាគឦសាន ព្រមទាំងអាចផ្សារភ្ជាប់ទៅនឹងគម្រោងទេសចរណ៍សក្តានុពលផ្សេងៗទៀតក្នុងតំបន់។ គម្រោងនេះ ក៏នឹងអាចផ្សារភ្ជាប់ទៅនឹងគម្រោងព្រែកជីកហ្វូណនតេជោ ដែលស្ថិតនៅប៉ែកខាងលើនៃទន្លេមេគង្គ (Upper Mekong) តភ្ជាប់ផ្លូវទឹកពីខេត្តកំពង់ចាម មកដល់ក្នុងខេត្តក្រចេះ និងមកកាន់តំបន់ភូមិភាគឦសាន។ គម្រោងនេះ នឹងបង្កើននូវសក្តានុពលផ្នែកទេសចរណ៍បន្ថែមសម្រាប់ខេត្តក្រចេះ សំដៅដល់ការបង្កើតនូវឱកាសការងារថ្មីៗសម្រាប់ប្រជាជននៅក្នុងតំបន់ និងទាក់ទាញនូវការអភិវឌ្ឍថ្មីៗដែលអាចជំរុញការអភិវឌ្ឍសេដ្ឋកិច្ចកម្ពុជា ជាពិសេសតំបន់ភូមិភាគឦសានទាំងមូល។